Agorodd tîm Opsiynau Cymunedol Gwasanaethau Cymdeithasol gaffe cymunedol yn Institiwt Blaenau yn ddiweddar. Mae’r caffe yn bartneriaeth gyda Blaina Community Institute Limited ac mae’n cynnig cyfleoedd lleoliadau gwaith a gwirfoddoli gwerthfawr i oedolion gydag anableddau i ddatblygu sgiliau bywyd, cymdeithasol a chyfleoedd gwaith o fewn byd arlwyo a lletygarwch.
Dywedodd Mary Welch, Rheolwr Opsiynau Cymunedol o fewn Gwasanaethau Cymdeithasol: “Mae’r fenter gyffrous yma wedi rhoi cyfle i ni weithio gyda grŵp cymunedol yn y Blaenau fel y gallwn roi bywyd newydd i un o adeiladau hanesyddol Blaenau Gwent a hefyd ddangos talentau arlwyo y staff o fewn Gofal Cymdeithasol ac yn bwysig, gynnig lleoliadau gwaith y mae angen mawr amdanynt i’r rhai yr ydym yn eu cefnogi. Mae’r cynllun hwn yn adeiladu ar y gwaith datblygu a wnaethom eisoes gyda Gwasanaethau Prydau Cymunedol Blaenau Gwent, lle’r ydym yn cynnig te prynhawn a snaciau ysgafn i’w dosbarthu o ddrws i ddrws gyda chiniawau canol-dydd traddodiadol ar gyfer y bobl hynny na all baratoi eu bwyd eu hunain.”
Agorodd y caffe ei ddrysau ym mis Medi 2023 a’r wythnos hon fe wnaethant gynnal parti i ddathlu’r agoriad ac i ddiolch i’r holl bobl a weithiodd yn ddiflino i agor y fenter. Yn ymuno â’r staff gofal cymdeithasol a’r myfyrwyr arlwyo yn y parti agoriadol roedd cynrychiolwyr o’r cyngor lleol, aelodau etholedig, aelodau a ffrindiau pwyllgor Institwt Blaenau a grwpiau cymunedol ehangach tebyg i Gymdeithas Cartrefi Tai Calon a ddarparodd gyllid grant i adnewyddu’r caffe ac Ymddiriedolaeth Hamdden Aneurin sy’n gweithio yn adeilad hanesyddol Institiwt Blaenau.
Cipiwyd yr uchod gan y Cynghorydd Chris Smith, y cynghorydd Hayden Trollop a'r cynghorydd Tommy Smith a fynychodd y digwyddiad lansio.
Yn y lansiad dywedodd y Cyng Hayden Trollop (Aelod Cabinet Gwasanaethau Cymdeithasol): “Mae’r gweithio partneriaeth yn y Stute Café rhwng Gwasanaethau Cymdeithasol Oedolion Blaenau Gwent a phwyllgor rheoli Institiwt Blaenau wedi galluogi’r Cyngor i symud ymlaen â dwy flaenoriaeth allweddol sef hyrwyddo cynhwysiant a phwysigrwydd cymuned. Ar ran Cyngor Blaenau Gwent, hoffwn ddymuno pob llwyddiant i’r prosiect blaengar hwn a gobeithiaf y bydd pobl Blaenau a’r trefi o amgylch yn cwrdd yn y safle cymunedol gwych hwn am flynyddoedd lawer i ddod.”
Mae’r caffe eisoes wedi profi’n llwyddiant ers ei agor a chaiff ei groesawu fel safle i’r gymuned gwrdd am sgwrs gyda theisennau newydd eu pobi, paninis neu ddim ond dishgled o de 4 diwrnod yr wythnos – dyddiau Mawrth i ddyddiau Gwener rhwng 9am-4pm. Mae Stute Café yn: Institiwt Blaenau, Stryd Fawr, Blaenau, NP13 3BN.
Cliciwch yma i weld y fwydlen.