Daeth cannoedd o bobl i ddigwyddiad cymunedol arbennig i helpu i lansio Hyb Cymorth i Deuluoedd newydd Cyngor Blaenau Gwent. Profodd y diwrnod hwyl i'r teulu ym Mharc Bedwellty, Tredegar, yn hynod boblogaidd yng nghanol heulwen mis Mai.
Mae'r Hyb Cymorth i Deuluoedd yn dwyn ynghyd ystod eang o wasanaethau cymorth i deuluoedd a'r blynyddoedd cynnar ac yn darparu un pwynt cyswllt i unrhyw un sy'n chwilio am arweiniad neu gymorth. Mae dull "dim drws ffrynt anghywir" yn sicrhau bod unrhyw un sy'n estyn allan yn cael ei gyfeirio at y cymorth, y cyngor neu'r wybodaeth fwyaf priodol iddynt.
Mae'r Hyb yn cynnig cymorth targedig a chyffredinol. Mae hyn yn cynnwys gwasanaethau ymyrraeth gynnar ac ataliol i deuluoedd a allai fod angen cymorth ychwanegol, ochr yn ochr â gwybodaeth am ofal plant, cyfleoedd chwarae, grwpiau rhiant a phlentyn bach, gweithgareddau plant, digwyddiadau a chlybiau lleol. Mae'r nod yn syml: sicrhau y gall teuluoedd a gweithwyr proffesiynol gael mynediad at y cymorth cywir, ar yr amser cywir – os ydyn nhw’n wynebu heriau cymhleth neu'n gwneud ymholiad syml.
Fel rhan o'r lansiad, mae'r hyb wedi cyflwyno amrywiaeth o adnoddau newydd, gan gynnwys:
- Tudalennau cyfryngau cymdeithasol integredig i wella cyfathrebu a hygyrchedd
- Platfform Padlet newydd sy'n cynnwys gwybodaeth am wasanaethau, adnoddau a digwyddiadau
- Rhif ffôn a chyfeiriad e-bost pwrpasol ar gyfer ymholiadau
- Ffurflen ymholiadau ar-lein hawdd ei defnyddio
Daeth y digwyddiad ag amrywiaeth o wasanaethau ynghyd, gan gynnig gweithgareddau rhyngweithiol hwyliog ochr yn ochr â gwybodaeth werthfawr i deuluoedd. Cafodd bresenoldeb da a derbyniad cynnes, gan amlygu'r gefnogaeth gymunedol gref i'r hyb newydd.
Dywedodd yr Aelod Cabinet dros Blant, Pobl Ifanc a Theuluoedd, y Cynghorydd Sue Edmunds:
“Mae sicrhau bod gan bob plentyn ym Mlaenau Gwent y cyfle i gael y dechrau gorau mewn bywyd yn flaenoriaeth uchel i ni, ac fel rhan o hyn rydym am wneud y broses o estyn allan am gymorth neu gyngor mor hawdd a chyfforddus ag y bo modd. Mae'r Hyb Cymorth i Deuluoedd newydd yn dod â phob cymorth, gweithgaredd a chyngor blynyddoedd cynnar o dan un to, sy'n hawdd ei gyrchu ac yn fwy ystyriol o rieni/gofalwyr.”
Dyma sut i gysylltu â'r Hyb Cymorth i Deuluoedd:
- Teleffon 01495 315700
- E-bost: FamilySupportHub@blaenau-gwent.gov.uk
- Dilynwch eu Facebook: https://www.facebook.com/bgfis
