Mae pobl ifanc wedi defnyddio celf graffiti i gynhyrchu murlun o arwyr cymunedol lleol ar safle bws yn Abertyleri, Blaenau Gwent, wrth iddynt weithio i wneud gwahaniaeth cadarnhaol i'w cymuned.
Mae'r bobl ifanc dan sylw yn rhan o grŵp Dyfodol Cadarnhaol Gwasanaeth Ieuenctid Cyngor Blaenau Gwent. Daeth y murlun i fodolaeth ar ôl ymgysylltu â'r grŵp ar yr hyn roedden nhw'n credu allai fod yn weithgareddau cadarnhaol i helpu i ddargyfeirio pobl ifanc i ffwrdd o ymddygiad gwrthgymdeithasol yn yr ardal. Gwnaethant fynegi diddordeb mewn celf graffiti y gellid ei defnyddio mewn ffordd gadarnhaol.
Mae'r prosiect murlun yn rhan o fenter ehangach, Tasglu Ymddygiad Gwrthgymdeithasol newydd dan arweiniad Cyngor Blaenau Gwent mewn partneriaeth â'r Gwasanaeth Ieuenctid, Heddlu Gwent a Tai Calon Community Housing. Mae'r Tasglu yn cysylltu â chymunedau lleol i fynd i'r afael â phryderon am ymddygiad gwrthgymdeithasol a gyflawnir gan bobl o bob oed, gan gefnogi pobl i roi gwybod amdano a gweithio i fynd i'r afael â rhai o'r achosion sylfaenol.
Ar ôl cynnal arolwg ar-lein, dewisodd y bobl ifanc Jack a Richard Shore i ymddangos ar y murlun, tad a mab sy’n adnabyddus ac uchel eu parch am eu gwaith gyda Chrefft Ymladd Gymysg yn y gymuned. Mae Jack Shore, o Abertyleri, yn athletwr proffesiynol crefft ymladd gymysg o Gymru sydd ar hyn o bryd yn cystadlu yn adran Pwysau Plu’r Bencampwriaeth Ymladd Eithaf (UFC). Mae ei dad Richard yn adnabyddus yn y gymuned am redeg campfa MMA a gweithio gyda phobl ifanc.
Hefyd yn ymddangos ar y murlun mae Alex Wiltshire (Boyo) sydd wedi cael ei gydnabod am ei waith gyda phobl ifanc yn y fwrdeistref, gan ddatblygu eu sgiliau celf, gan gynnwys, ffilmio, ysgrifennu cerddoriaeth a pherfformio.
Roedd y gymuned hefyd am gydnabod y Gwarcheidwad yn Abertyleri, a gomisiynwyd i goffáu 50 mlynedd ers y drychineb fwyngloddio yn Chwe Chloch ym 1960 a laddodd 45 o ddynion. Mae'r cerflun hefyd yn ymddangos ar y murlun.
Roedd Richard, Jack ac Alex i gyd yno gyda'r bobl ifanc o'r grŵp i ddadorchuddio'r prosiect yn swyddogol. Yn ymuno â nhw roedd yr Aelod Cabinet sy’n gyfrifol am Ddiogelwch Cymunedol, y Cynghorydd Helen Cunningham, cynghorydd ward lleol, y Cynghorydd Keith Chaplin, a chynrychiolwyr Heddlu Gwent.
Dywedodd yr Aelod Cabinet, y Cynghorydd Helen Cunningham:
"Mae'n hyfryd gweld y murlun yn dod â lliw i’r safle bws yn Abertyleri. Mae’n well fyth ei fod yn cynnwys wynebau lleol y mae'r bobl ifanc yn eu hedmygu ac yn cael eu hysbrydoli ganddynt.
"Mae ymddygiad gwrthgymdeithasol yn effeithio ar ansawdd bywyd pobl a pha mor ddiogel maen nhw'n teimlo gartref ac allan yn y gymuned. Diolch i'r holl drigolion a busnesau sydd wedi ymgysylltu â gwaith y Tasglu ac am eu gwyliadwriaeth a'u cydweithrediad wrth roi gwybod am ymddygiad gwrthgymdeithasol. Yn flaenorol, rydym wedi rhannu ein llwyddiant yn cael Gwaharddebau Sifil yn erbyn unigolion sy'n mynnu cyflawni ymddygiad gwrthgymdeithasol. Mae heddiw’n ymwneud â thaflu goleuni ar y ffyrdd y mae pobl ifanc yn edrych at eu modelau rôl eu hunain ac yn ysbrydoli eraill i ddilyn eu hesiampl a lleihau apêl ymddygiad gwrthgymdeithasol yn eu cymdogaethau".
Dywedodd Alex Wiltshire:
"Mae'n anrhydedd i mi gael fy ystyried a'm cynnwys fel rhan o'r darn celf cymunedol hwn sy'n canolbwyntio ar ysbrydoliaeth a dyfodol cadarnhaol yn ein cymoedd. Mae'n anhygoel gweld canlyniadau undod a chreadigrwydd yn ein hardal."
Mae'r gwasanaeth ieuenctid yn darparu grŵp Dyfodol Cadarnhaol gyda phobl ifanc o ysgolion uwchradd lleol ddeuddydd yr wythnos. Nod y prosiect yw cefnogi pobl ifanc sydd ar drothwy gwaharddiad parhaol ac sydd ar fin cael eu derbyn i'r system cyfiawnder ieuenctid am y tro cyntaf.
Diolch yn fawr i Anthony Smith yn Consumersmith Fine Art, yr artist a roddodd y cymorth, y sgiliau a'r hyder i bobl ifanc gynhyrchu'r gwaith celf.
Mae'r prosiect wedi cael ei ariannu gan Lluosi drwy Gyllid Ffyniant Gyffredin. Mae'r bobl ifanc wedi cymryd rhan o'r dechrau i'r diwedd gyda'r prosiect, gan gynnwys rheoli'r gyllideb, sydd wedi cefnogi datblygiad eu sgiliau rhifedd.
Dyma ail brosiect celf graffiti y Gwasanaeth Ieuenctid ym Mlaenau Gwent, gydag un yn y maes parcio yn Y Gwaith, Glynebwy, yn dathlu treftadaeth lofaol yr ardal, ac rydym yn gobeithio gwneud mwy cyn bo hir. Maen nhw nid yn unig yn edrych yn wych, ond hefyd yn helpu i roi ymdeimlad o falchder go iawn i bobl ifanc yn eu cymuned.
Dysgwch fwy am y Tasglu Ymddygiad Gwrthgymdeithasol ym Mlaenau Gwent yma – https://www.blaenau-gwent.gov.uk/cy/preswylwyr/argyfyngau-ac-atal-troseddau/diogelwch-cymunedol/ymddygiad-gwrthgymdeithasol/
