Yn Fix It February, mae Cyngor Blaenau Gwent yn dathlu caffis trwsio yn y fwrdeistref sirol, lle mae dros 600 o eitemau eisoes wedi cael bywyd newydd!
Mae'r caffis trwsio’n bartneriaeth rhwng y Cyngor, sefydliadau lleol ac yn bwysicaf oll aelodau talentog o'r gymuned sy'n rhoi o’u hamser am ddim i drwsio eitemau cartref pobl.
Dyma enghraifft wych o fargen newydd Blaenau Gwent - ffordd newydd y Cyngor o weithio gyda chymunedau, i'w cynnwys a'u grymuso mewn gwasanaethau lleol.
O hwfers a setiau teledu i emwaith a theganau plant, mae'r cannoedd o atgyweiriadau llwyddiannus wedi cael effaith amgylcheddol sylweddol ac yn enghraifft bwerus o weithredu cymunedol ar ei orau. Mae'r model hwn nid yn unig yn darparu manteision amgylcheddol - mae wedi creu gwerth cymdeithasol sylweddol, gan roi hwb i hyder, sgiliau, lles a chysylltiad cymunedol.
Fel rhan o'i Strategaeth Adnoddau a Gwastraff drafft newydd, mae'r Cyngor yn edrych i dyfu'r cynnig caffi atgyweirio yn y fwrdeistref, gallwch ddweud eich dweud ar y strategaeth cyn bo hir.
Mae Fix It February yn cael ei ddathlu gan Gaffi Trwsio Cymru.
Dywedodd y Cynghorydd Tommy Smith, Dirprwy Arweinydd y Cyngor a’r Aelod Cabinet dros Wasanaethau Cymdogaeth ac Amgylcheddol:
"Mae Fix It February yn amser perffaith i ddathlu cyflawniad enfawr ein gwirfoddolwyr, sydd eisoes wedi atgyweirio mwy na 600 o eitemau ar gyfer trigolion lleol. Mae'r gwaith hwn yn lleihau gwastraff, torri carbon, a chryfhau ein cymunedau. Trwy Fargen Blaenau Gwent, rydym yn falch o gefnogi pobl leol i gymryd yr awenau ar drwsio ac ailddefnyddio, gan helpu i feithrin sgiliau, a gwella hyder a gwytnwch ar draws y fwrdeistref sirol."
Mae Tîm Strategaeth Gwastraff y Cyngor wedi gweithio i alluogi cymunedau i arwain eu prosiectau atgyweirio ac ailddefnyddio eu hunain, gan ddarparu cymorth gyda chostau cychwyn, marchnata, recriwtio gwirfoddolwyr a chysylltiadau â sefydliadau perthnasol. Gwnaethpwyd hyn drwy weithio gyda phartneriaid gan gynnwys GAVO, Iechyd Cyhoeddus Cymru, Men's Sheds a grwpiau cymunedol i adeiladu rhwydwaith cynaliadwy ac amrywiol o wirfoddolwyr.
Mae Luke Mason yn wirfoddolwr yng Nghaffi Trwsio Rasau yng Nglynebwy. Mae Luke yn wynebu heriau gyda rhyngweithio cymdeithasol ac mae wedi darganfod pwrpas a hyder newydd trwy helpu ymwelwyr gyda'u heitemau trydanol.
Meddai Luke: "Mae helpu eraill yn ffordd onest a gofalgar o fyw eich bywyd. Dod â hapusrwydd i gleientiaid ar ôl datrys eu problemau yw'r teimlad gorau."
Cymerwch ran yn Fix It February. Cynhelir caffis trwsio yn:
- Stiwt Glynebwy (trydydd dydd Llun y mis) 2pm i 4pm
- Canolfan Adnoddau Rasa (pedwerydd dydd Llun y mis) 10.30am i 12.30
- Neuadd Bentref Stocktonville, Tredegar (dydd Gwener olaf y mis) 10.30am i 12.30
