Tŷ Augusta

Tŷ Augusta Gwasanaethau

Lle i Ymlacio, Dysgu a Thyfu

Mae Tŷ Augusta yn wasanaeth seibiant preswyl croesawgar a redir gan Wasanaethau Cymdeithasol Blaenau Gwent. Mae'n darparu seibiannau tymor byr i oedolion a phlant ag anableddau dysgu, gan gynnig amgylchedd diogel a chefnogol lle gall unigolion fwynhau profiadau newydd, datblygu sgiliau byw’n annibynnol a meithrin hyder. Ar yr un pryd, mae gofalwyr yn elwa o amser sydd ei angen yn fawr i orffwys a magu nerth newydd. Gyda chyfleusterau modern, staff ymroddedig ac ystod eang o weithgareddau, mae Tŷ Augusta yma i gefnogi llesiant ac annibyniaeth.

Yr Hyn a Gynigiwn

Mae Tŷ Augusta yn cynnig seibiannau arhosiad byr i hyd at bump o bobl ar y tro (oedolion neu blant, ond nid y ddau gyda'i gilydd). Trefnir arhosiadau trwy system archebu i sicrhau bod pob person yn derbyn y gefnogaeth gywir ar yr amser cywir. Mae hyd ac amlder yr arhosiadau yn seiliedig ar asesiadau unigol a chanlyniadau gofalwyr. Rydym hefyd yn cefnogi unigolion sy'n derbyn Gofal Iechyd Parhaus.

Pam dewis Tŷ Augusta? 

• Rhoi seibiant neu wyliau i ofalwyr o'u rôl ofalu
• Cynnig cyfle i unigolion brofi byw i ffwrdd o gartref
• Datblygu sgiliau byw’n annibynnol fel coginio, rhyngweithio cymdeithasol a hyder

Cyfleusterau

Mae Tŷ Augusta yn gwbl hygyrch ac wedi'i gynllunio i ddiwallu ystod eang o anghenion.

Mae'r cyfleusterau'n cynnwys:

• Adeilad diogel, un lefel gyda mynediad i gadeiriau olwyn
• Ystafelloedd gwely ar y llawr gwaelod gydag ystafelloedd ymolchi en-suite neu gyfagos
• Pum ystafell wely gyda theclynnau codi ac ystafelloedd ymolchi en-suite cwbl hygyrch
• Lolfa fawr ac ystafell gweithgareddau ar wahân
• Cegin wedi'i chyfarparu'n llawn ac ystafell fwyta fawr
• Cyfleusterau golchi dillad
• Ystafell synhwyraidd a gardd synhwyraidd gaeedig
• Patio helaeth a gardd wedi'i thirlunio
• Parcio i hyd at 10 cerbyd
• Mynediad hawdd i lwybrau cerdded dymunol, gan gynnwys Llyn yr Ŵyl gerllaw
• Minibws yn darparu cludiant i weithgareddau cymunedol
• Swyddfa/man derbynfa ar wahân
• Mae pob ystafell wely yn cynnwys setiau teledu clyfar, dodrefn cyfforddus a chynlluniau hygyrch.

Prydau Bwyd

Anogir gwesteion i gymryd rhan mewn paratoi prydau bwyd yn seiliedig ar eu chwaeth a'u hanghenion dietegol eu hunain. Darperir prydau bwyd dyddiol, a gofynnir i unigolion ddod ag arian ar gyfer unrhyw weithgareddau, prydau bwyd neu bethau ychwanegol pan fyddant allan yn y gymuned.

Ein Tîm

Mae tîm Tŷ Augusta yn brofiadol, yn gyfeillgar ac wedi ymrwymo i greu amgylchedd hamddenol a chartrefol. Mae pob gwestai yn cael gweithiwr cyswllt sy'n ymweld ag oedolion gartref neu blant yn yr ysgol cyn eu harhosiad i sicrhau bod anghenion unigol yn cael eu diwallu.

Ynglŷn â'n Staff

• Cymhwyster Iechyd a Gofal Cymdeithasol Lefel 2 QCF fel isafswm
• Un aelod o staff effro ar ddyletswydd nos
• Hyfforddiant, goruchwyliaeth a chyfarfodydd tîm rheolaidd i gynnal safonau uchel
• Lefelau staffio wedi'u teilwra i ganlyniadau unigol

Tystebau Staff

Clywch gan y tîm ymroddedig sy'n gwneud Tŷ Augusta yn lle mor arbennig:

“Dw i wedi bod yn rhan o dîm Augusta ers bron i 19 mlynedd, ac mae wir yn teimlo fel ail deulu. Mae'r gefnogaeth rydyn ni'n ei rhoi a'i derbyn yn gwneud gwahaniaeth gwirioneddol a dw i'n falch o fod yn rhan ohono.”

— Hayley Williams

“Dechreuais weithio yn Nhŷ Augusta 4 blynedd yn ôl fel prentis, lle cwblheais fy nghymhwyster Iechyd a Gofal Cymdeithasol Lefel 2 a 3. Mae’r swydd yn hynod werth chweil a dw i’n mwynhau pob agwedd ar fy ngwaith.”

— Katie

“Dw i wrth fy modd yn gweithio yn Nhŷ Augusta – does dim dau ddiwrnod yr un fath! Mae'n hyfryd bod o gwmpas y tîm staff a'r gwesteion. Dw i wedi gweithio yn Nhŷ Augusta ers 24 mlynedd a dw i’n gobeithio aros yma nes i mi ymddeol.”

— Bev

“Dw i wedi gweithio yn Nhŷ Augusta am y 18 mlynedd diwethaf. Dw i wir yn mwynhau amrywiaeth y swydd gan fod pob diwrnod yn wahanol. Mae'n swydd werth chweil a boddhaol iawn.”

— Gemma

Gweithgareddau

Rydym yn cefnogi gwesteion i fwynhau gweithgareddau maen nhw eisoes yn eu caru ac i roi cynnig ar brofiadau newydd. Mae gweithgareddau nodweddiadol yn cynnwys:

• Nofio, tripiau i’r sinema a’r theatr
• Mynd i dafarndai, caffis, clybiau a siopa
• Tripiau dydd a gwibdeithiau
• Dawnsio, karaoke, cerddoriaeth, peintio, gemau bwrdd a thenis bwrdd
• Coginio, bowlio a barbeciws

Mae Cronfa Amwynderau ar waith yn Nhŷ Augusta i helpu i ariannu gweithgareddau ychwanegol, gyda chefnogaeth digwyddiadau codi arian rheolaidd.

Iechyd, Ffydd a Chymuned

• Gall gwesteion gofrestru fel preswylydd dros dro gyda Meddyg Teulu lleol neu gadw at eu Meddyg Teulu arferol yn dibynnu ar y lleoliad
• Rydym yn cefnogi unigolion i fynychu eu lle addoli dewisol a diwallu anghenion crefyddol eraill lle bo modd

Taliadau

Mae pob unigolyn yn derbyn asesiad o'u hamgylchiadau ariannol personol i benderfynu ar unrhyw gyfraniad tuag at gost eu harhosiad.

Oriel

Cymerwch olwg y tu mewn i Dŷ Augusta ac archwiliwch ein mannau croesawgar

 

Mae Tŷ Augusta wedi'i leoli yn Victoria, Glynebwy, tua dwy filltir i'r de o ganol y dref.

Cysylltwch â Ni