Mae Ysgol Gyfun Tredegar wedi cael ei chanmol gan Estyn am greu amgylchedd dysgu gofalgar, diogel a chynhwysol sy'n ysbrydoli disgyblion ac yn codi dyheadau ar draws cymuned yr ysgol.
Socials: Da iawn i Ysgol Gyfun Tredegar ar ei hadroddiad diweddar gan Estyn, a ddisgrifiodd yr ysgol fel amgylchedd gofalgar, diogel a chynhwysol sy'n ysbrydoli disgyblion ac yn codi dyheadau ar draws cymuned yr ysgol.
Ymhlith yr uchafbwyntiau niferus, nododd yr adroddiad:
- Cymuned ysgol ofalgar, ddiogel a chynhwysol
- Staff a disgyblion sy'n dangos ymrwymiad cryf i'w hysgol a'u cymuned
- Athrawon sy'n adeiladu amgylcheddau tawel, wedi'u rheoli'n dda, ac yn cymhwyso gwybodaeth gref am bynciau
- Ymrwymiad cryf i hyrwyddo presenoldeb da
- Ymrwymiad cryf i gefnogi disgyblion ag Anghenion Dysgu Ychwanegol
- Arweinyddiaeth dawel, bwrpasol gyda ffocws clir ar godi dyheadau a chanlyniadau
- Llywodraethwyr profiadol a brwdfrydig
Dywedodd y Pennaeth Charlotte Leaves:
"Rydyn ni wrth ein bodd gyda'n hadroddiad Estyn, sy'n dyst go iawn i waith caled ac ymroddiad di-baid ein staff, ein llywodraethwyr, ein disgyblion a'n teuluoedd. Nid yw ein mantra o 'Weithio Gyda’n Gilydd dros Lwyddiant' erioed wedi bod yn fwy amlwg.
"Ar ben hynny, rydym wrth ein bodd bod Estyn wedi taflu goleuni ar ein gwaith o amgylch arweinyddiaeth disgyblion, gan gydnabod hyn fel cryfder nodedig.
Er ein bod yn eithriadol o falch o'r canfyddiadau – a byddwn ni’n dathlu ein llwyddiant ar y cyd – ni fyddwn yn gorffwys ar ein rhwyfau!
"Rydyn ni'n gwybod bod mwy i’w wneud a byddwn ni’n herio ein hunain yn ddi-baid i ddod hyd yn oed yn well a sicrhau hyd yn oed mwy o lwyddiant."
Dywedodd y Cynghorydd Sue Edmunds, Aelod Cabinet dros Blant, Pobl Ifanc a Theuluoedd:
"Llongyfarchiadau i Ysgol Gyfun Tredegar ar yr adroddiad gwych hwn. Rydym yn gweithio mewn partneriaeth agos â'n hysgolion ar ein blaenoriaethau i adeiladu sylfeini cadarn ar gyfer dysgu a datblygiad gydol oes, ac i rymuso pobl ifanc i fyw bywydau gwybodus, annibynnol ac iach. Mae'r adroddiad hwn yn dangos yn glir ymrwymiad yr ysgol i'r nodau hyn – da iawn bawb."
Mae'r adroddiad hefyd yn cydnabod ymroddiad yr ysgol i'w gwerthoedd craidd a'r gymuned leol, gyda darpariaethau llesiant sy'n cynnig cefnogaeth emosiynol werthfawr i ddisgyblion.
Cydnabuwyd canolfan adnoddau dysgu (CAD) yr ysgol, a sefydlwyd ddwy flynedd yn ôl, fel darpariaeth feithringar a chynhwysol sy'n cefnogi disgyblion ag awtistiaeth yn effeithiol, gan eu helpu i ddatblygu hyder, cyfathrebu a sgiliau cymdeithasol.
Mae'r adroddiad yn amlinellu tri argymhelliad allweddol i wella canlyniadau myfyrwyr ymhellach.
Am ragor o wybodaeth, cyfeiriwch at yr adroddiad arolygu llawn, sydd ar gael yma.
