Bydd Abertyleri yn cymryd lle canolog y mis Mawrth hwn wrth i fusnesau, trigolion a’r Cyngor uno ar gyfer hwb wythnos arbennig i’r dref, menter ymarferol sy’n canolbwyntio ar ddangos beth all gael ei gyflawni pan fydd pobl yn cydweithio i wella canol eu tref.
Yn rhedeg o ddydd Mawrth, 10fed o Fawrth i ddydd Sadwrn, 14eg o Fawrth, bydd y rhaglen, dan arweiniad Creative Communities International, trwy gefnogaeth gan Lywodraeth Cymru a Chomisiwn Dylunio Cymru, yn dod â’r gymuned ynghyd yn y lle cyntaf ar gyfer cyfres o ddigwyddiadau ymarferol yn y Met, Abertyleri ac yna gweithdy ymarferol undydd i drawsnewid Stryd Somerset, Abertyleri. Mae’r fenter yn canolbwyntio ar gamau gweithredu ymarferol i greu effaith uniongyrchol.
Fel rhan o Fargen Blaenau Gwent, ffordd newydd o weithio gyda chymunedau, mae’r Cyngor yn gwrando ar bobl leol ac yn gweithio gyda nhw ar yr hyn sy’n bwysig iddyn nhw.
Dywedodd y Cynghorydd John Morgan, Aelod Cabinet dros yr Economi a Lleoedd:
“Rydym wedi ymrwymo i greu cymunedau bywiog, sydd wedi’u cysylltu’n dda lle gall pobl a busnesau ffynnu. Yn ein Cynulliad Dinasyddion diweddar, dywedodd llawer ohonoch wrthym eich bod am weld gwelliannau i ganol ein trefi, a siaradom am sut y gall trigolion, busnesau a sefydliadau lleol ddod at ei gilydd i wneud i hyn ddigwydd ac mae’r hwb wythnos yn enghraifft wych o hyn – byddwn yn annog unrhyw un yn yr ardal i gymryd rhan.”
Mae’r wythnos yn cynnwys noson wybodaeth, sesiynau cynllunio, gweithdai busnes gyda’r nod o leihau rhwystrau a chynyddu nifer y bobl sy’n ymweld, a bydd yn cyrraedd uchafbwynt gyda Thrawsnewidiad Undydd ddydd Sadwrn, 14eg o Fawrth.
Mae’r digwyddiadau ar agor i fusnesau lleol, trigolion, grwpiau cymunedol a gwirfoddolwyr. Nid oes angen unrhyw brofiad, dim ond parodrwydd i gymryd rhan. Mae mynychu am ddim, ond mae cofrestru’n hanfodol.
Nod yr Hwb Wythnos i’r Dref yw dangos sut y gall gweithredu cymunedol ar y cyd helpu i lunio canol y dref fwy bywiog, croesawgar a llewyrchus ar gyfer Abertyleri.
Bydd yr wythnos yn cyrraedd uchafbwynt gyda Thrawsnewidiad Undydd ddydd Sadwrn, 14eg o Fawrth, o 8yb i 5yp, pan fydd lle allweddol ar Stryd Somerset yn cael ei drawsnewid. Bydd y trawsnewidiad yn dangos beth sy'n bosibl gyda chydweithio, creadigrwydd a chyllideb gymedrol, gan gynnig gweledigaeth wirioneddol ar gyfer dyfodol canol y dref. Mae'r gyllideb ar gyfer y trawsnewidiad undydd yn cael ei darparu trwy Gronfa Ffyniant a Rennir Llywodraeth y DU.
Mae'r trefnwyr yn disgrifio'r diwrnod fel un ymarferol a hwyliog, gan ddod â gwirfoddolwyr, busnesau a grwpiau cymunedol ynghyd i gyflawni newid gweladwy mewn un diwrnod.
Cofrestrwch heddiw: https://www.eventbrite.com.au/e/one-week-town-boost-abertillery-2026-tickets-1982739391895