Mae cynghorau Blaenau Gwent a Thorfaen yr wythnos hon wedi cyflwyno cyd-gynllun uchelgeisiol ar gyfer twf ac adfywio hirdymor, cynaliadwy. Craffwyd ar y 'Glasbrint ar gyfer Twf' newydd gan y Pwyllgor Craffu Datblygu Economaidd a Rheolaeth Amgylcheddol, a groesawodd y weledigaeth a'r cynlluniau i gynnwys pobl go iawn i drawsnewid eu cymunedau.
Mae 'Ffynnu Gyda'n Gilydd – Coridor Twf y Cymoedd Technoleg' yn weledigaeth ar y cyd i greu rhanbarth mwy ffyniannus i drigolion, cymunedau a busnesau erbyn 2035, gan ganolbwyntio ar dair thema gyffredinol:
- Seilwaith a Buddsoddi
- Twf Busnes a Chyflogaeth
- Pobl a Sgiliau
Ym Mlaenau Gwent, mae hyn eisoes yn cael ei hybu gan gyllid allanol gan gynnwys y Gronfa Twf Lleol, y Gronfa Gymdogaeth Balchder Bro £20miliwn ar gyfer Dyffryn Sirhywi, a'r Gronfa Effaith Balchder Bro £1.5miliwn – bydd pob un ohonynt yn helpu i ddatblygu prosiectau, ac yn cefnogi cymunedau i adeiladu lleoedd ffyniannus.
Bydd pobl leol yn rhan lawn o'r cynlluniau, wedi'u hysbrydoli gan ffordd newydd y Cyngor o weithio gyda chymunedau drwy Fargen Blaenau Gwent. Yn wir, bydd cyllid Balchder Bro yn cael ei ddyrannu trwy Fwrdd Cymdogaeth newydd, sy'n cynnwys trigolion a phartneriaid, a fydd yn penderfynu sut mae'r arian yn cael ei wario dros y cyfnod o 10 mlynedd, gan rymuso cymunedau i feddwl am yr hyn maen nhw eisiau ei weld. Bydd y Gronfa Effaith yn cael ei gwasgaru o amgylch y fwrdeistref, ac yn cael ei defnyddio i wella mannau cymunedol, ardaloedd chwarae plant a strydoedd mawr yn Nant-y-glo, Blaenau a Brynmawr.
O ran canol trefi, bydd gan bob un Gynllun Creu Lleoedd, a fydd yn destun ymgynghoriad â phobl leol a rhanddeiliaid allweddol.
Mae'r Glasbrint yn cefnogi blaenoriaethau'r Cyngor fel Cyngor Marmot yn llawn, ynghyd â'i Genhadaeth i 'Yrru twf economaidd cynaliadwy a chreu cymunedau bywiog, cysylltiedig lle gall pobl a busnesau ffynnu.' Mae hyn i gyd wedi'i gynllunio i leihau anghydraddoldebau o fewn cymunedau. Mae hefyd yn ymateb yn uniongyrchol i flaenoriaethau trigolion a'r egwyddorion y cytunwyd arnynt yn y Cynulliad Dinasyddion diweddar ar y Fargen, a alwodd am ganol trefi ffyniannus, mwy o gyfleoedd cyflogaeth a hyfforddiant lleol, a rôl wrth siapio ble maen nhw’n byw.
Mae'r Glasbrint yn nodi 14 ffrwd waith ar y cyd sy'n cwmpasu cysylltedd trafnidiaeth, safleoedd strategol, cymorth busnes, mewnfuddsoddiad, sgiliau, cyflogadwyedd, creu lleoedd, canol trefi a thai.
Dywedodd y Cynghorydd John Morgan, Aelod Cabinet dros yr Economi a Lleoedd yng Nghyngor Blaenau Gwent:
"Mae'r Glasbrint hwn yn nodi gweledigaeth glir ac uchelgeisiol ar gyfer dyfodol ein cymunedau - a nawr, gyda rhywfaint o gyllid wedi'i sicrhau, gallwn ddechrau gwneud cynnydd gwirioneddol. Mae hwn yn gam mawr ymlaen wrth greu Blaenau Gwent a Thorfaen fwy ffyniannus, cysylltiedig a hyderus."
"Mae effaith gyfunol y Glasbrint a'r rhaglenni cyllido newydd yn drawsnewidiol, ac rwy'n gyffrous am yr uchelgais a’r cyfeiriad. Trwy gyfuno cynllunio strategol, buddsoddiad a arweinir gan y gymuned a phiblinell gref o brosiectau cyflawnadwy, rydyn ni’n adeiladu'r sylfeini ar gyfer llwyddiant economaidd hirdymor a dyfodol tecach i'n trigolion. A'r peth gorau yw, rydyn ni'n rhoi pobl wrth wraidd hyn, gan wneud yn siŵr bod eu lleisiau yn cael eu clywed."
Bydd ymgynghoriad ac ymgysylltiad ar y Glasbrint yn cael ei gynnal dros y misoedd nesaf, a bydd cynllun cyflawni blynyddol yn cael ei ddatblygu.
Gweler y Glasbrint yma: [Glasbrint ar gyfer Twf | PDF]