Gwybodaeth Ategol ar Gyfer eich Bil 2021

Mae'r Cyngor wedi cytuno ar gyllideb ar gyfer 2021/22 ac mae'n bwriadu buddsoddi cyfanswm o £157 miliwn i ddarparu gwasanaethau i bobl Blaenau Gwent. Bydd y gyllideb y cytunwyd arni yn cynyddu cyllid ar gyfer Gwasanaethau Cymdeithasol (£1m), ysgolion (£1.47m) a Gwasanaethau Amgylcheddol (£0.68m) i ariannu pwysau costau, ac mae hefyd wedi cynyddu ei chyllideb ar gyfer y Cynllun Lleihau y Dreth Gyngor i £9.6m i ddarparu cymorth ariannol i drigolion lleol cymwys. Yn ogystal, mae'r Cyngor yn bwriadu cynyddu lefel y cronfeydd wrth gefn i gefnogi gwytnwch ariannol y Cyngor yn y tymor canolig.

Ar gyfer y flwyddyn ariannol nesaf sy'n cychwyn ar 1 Ebrill 2021, mae CBS Blaenau Gwent wedi gosod cynnydd yn y Dreth Gyngor o 3.3%. Mae hyn ymhlith yr isaf ledled Cymru a dyma'r isaf yn ardal Gwent Fwyaf.

Wrth gytuno ar y cynnydd hwn, mae'n ddyletswydd ar y Cyngor i sicrhau cydbwysedd cyfrifol o ran amddiffyn gwasanaethau a swyddi, ond hefyd dangos bod ystyriaeth wedi'i rhoi i ddiogelu buddiannau ehangach trigolion lleol, y gallai llawer ohonynt fod yn profi anawsterau ariannol. Cred y Cyngor ei fod wedi gwneud hyn trwy gymeradwyo cynnydd o ddim ond 72c ac 84c yr wythnos ar eiddo Band A a Band B yn y drefn honno, sy'n cyfrif am oddeutu 85% o'r holl eiddo ym Mwrdeistref y Sir. Yn y tymor canolig, mae'r Cyngor yn parhau gyda'i raglen ariannol strategol, o'r enw Pontio'r Bwlch a fydd yn ei alluogi i gynllunio ei wariant yn unol â'i gyllid. O fewn y fframwaith hwn bydd y Cyngor yn edrych ar ffyrdd pellach o sicrhau costau is a chynyddu incwm, gan liniaru'r effaith ar wasanaethau ar yr un pryd.

Yn y tymor canolig, efallai na fydd y Cyngor yn gallu darparu'r holl wasanaethau y mae'n eu darparu ar hyn o bryd. Er enghraifft, gallai eraill ddarparu rhai gwasanaethau, er na ellir diystyru atal rhai gwasanaethau.

Fodd bynnag, i gydnabod pwysigrwydd y Cyngor fel y cyflogwr lleol mwyaf, bu ac fe fydd ymrwymiad i osgoi diswyddiadau gorfodol lle bynnag y bo modd, a bydd ymgynghori â staff ac undebau llafur yn parhau trwy gydol y cyfnod hwn. Yn flaenorol, mae'r Undebau Llafur ar y Cyd wedi canmol y Cyngor am yr ymgysylltiad hwn a'r modd cyfrifol y mae'r Gyllideb wedi'i gosod.

Datblygwyd cynigion cyllidebol ar gyfer 2021/2022 gan ddefnyddio dull “Un Cyngor” a gwerthuswyd grwpiau gwleidyddol ar wahanol gamau o'r broses gosod cyllideb.

Mae effaith y pandemig Coronafeirws wedi golygu bod 2020/21 wedi bod yn flwyddyn anodd i bawb, er ein bod yn gobeithio y bydd 2021/22 yn flwyddyn o fusnes fel arfer i lawer o'r gwasanaethau y mae'r Awdurdod yn eu darparu ar hyn o bryd. Fodd bynnag, gan nad yw'r grant a dderbynnir gan Lywodraeth Cymru yn talu holl gostau'r Cyngor, rhaid i rai costau ddisgyn yn uniongyrchol i dalwr y Dreth Gyngor lleol a dyma pam mae angen cynnydd yn lefel leol y Dreth Gyngor.

Bydd y Cyngor yn parhau i fonitro cyllidebau’n agos trwy gydol 2021/2022 a bydd yn cynnal cyfres o adolygiadau ac ymgynghoriadau i lywio cynigion cyllideb y blynyddoedd i ddod.

Eich Bil Treth Gyngor 2021/2022

Cymhariaeth Amcangyfrif Gwariant Net ar gyfer 2020/2021 a 2021/2022